Məhkəmə-Hüquq Şurasının üzvü, Sumqayıt Apellyasiya Məhkəməsinin sədri Özbəkistanda beynəlxalq konfransda iştirak edib

Cari ilin 2-3 oktyabr tarixlərində Özbəkistan Respublikası Ali Məhkəmə Şurası və Özbəkistan Ədalət Akademiyasının təşkilatçılığı ilə Daşkənd şəhərində bu ölkənin Ədalət Akademiyasının rəsmi açılış mərasimi və “Yeni Özbəkistanda yüksək ixtisaslı hakimlər korpusunun komplektləşdirilməsi: İslahatların səmərəliyi və inkişaf perspektivi” adlı beynəlxalq konfrans keçirilib. 

Tədbirdə Məhkəmə-Hüquq Şurasının üzvü - Sumqayıt Apellyasiya Məhkəməsinin sədri Tofiq Paşayev iştirak edib.

Açılış mərasiminda Akademiya binası ilə tanışlıq olub, eləcə də Akademiyanın tarixi, məhkəmə simulyasiyası üçün məşq zalı, auditoriyalar barədə iştirakçılara məlumat verilib. 

Eyni zamanda ixtisaslı hakimlər korpusunun komplektləşdirilməsinin milli və beynəlxalq sistemləri, məhkəmə sistemi üçün ixtisaslı kadrların hazırlanmasında beynəlxalq əməkdaşlıq, peşəkar hakim korpusunun komplektləşdirilməsinin beynəlxalq standartları mövzularında müzakirələr aparılıb.

Tofiq Paşayev tərəfindən Azərbaycanda məhkəmə-hüquq sistemində həyata keçirilən son islahatlar, “Elektron məhkəmə” informasiya sisteminin funksional imkanlarının artırılması ilə rəqəmsal transformasiya sahəsində idarətmənin təkmilləşdirilməsi, hakimlərin fəaliyyətinin qiymətləndirilməsinə dair yeni qaydaların və metodologiyanın işlənib hazırlanması, o cümlədən vakant hakim vəzifəsinə namizədlərin seçilməsinə dair təkmilləşdirilmiş normativ tənzimlənmə, məhkəmələrdə əmək və icra intizami vəziyyətinə riayət edilmə vəziyyətinin öyrənilməsi barədə tədbir iştirakçılarına ətraflı məlumat verilib. Həmçinin məhkəmə statistikasının beynəlxalq təşkilatların tövsiyələri nəzərə alınmaqla yeni formalarının təsdiqi sahəsində görülmüş işlər, bu sahədə mövcud müsbət təcrübə və qazanılmış nailiyyətlərdən bəhs edilib. 

Konfransda aparılan bilik və təcrübə mübadiləsinin Azərbaycan məhkəmə sisteminin təkmilləşdirilməsi üçün faydalı olacağı vurğulanıb.