HAKİMLƏRİN SEÇKİ KOMİTƏSİNİN MƏLUMATI

Hakim korpusunun yüksək biliyə və mənəvi keyfiyyətlərə malik hüquqşünaslar hesabına komplektləşdirilməsinə dair dövlət başçısının tövsiyələrinin həyata keçirilməsi istiqamətində görülən tədbirlər çərçivəsində hakim vəzifəsinə namizədlərin beynəlxalq tələblər səviyyəsində və şəffaf prosedurlarla fasiləsiz seçimi davam etdirilir.

3 noyabr 2023-cü il tarixdə baş tutmuş test imtahanında müvəffəqiyyət qazanmış 154 nəfər namizədlə 22 dekabr 2023-cü ildə ilk dəfə olaraq elektron qaydada yazılı imtahan keçirilib. İmtahanda cinayət və mülki sahələr üzrə kazus xarakterli 2 inşa mövzusu 4 saat ərzində cavablandırılıb.

Hakimliyə namizədlərin cavab vərəqələri kodlaşdırılaraq anonim qaydada, ikiqat üsulla Hakimlərin Seçki Komitəsinin üzvləri və dəvət edilmiş mütəxəssislər tərəfindən ayrı-ayrılıqda yoxlanılıb. Qaydalara əsasən, namizədin həm cinayət, həm də mülki sahələr üzrə topladığı ballar cəmlənir və 2-yə bölünərək, yekun bal müəyyən edilir. Topladığı yekun bal 60 və ya daha çox olan namizəd yazılı imtahanın bu mərhələsindən keçmiş hesab edilir, bu şərtlə ki, onun hər inşa mövzusu üzrə ayrı-ayrılıqda topladığı ballar 50-dən az olmasın.

İmtahanın nəticəsinə görə 60 və daha çox bal toplamış 80 nəfər hakimliyə namizəd müsabiqənin növbəti mərhələsinə, şifahi imtahana buraxılıb. Qaydalara əsasən, yazılı imtahanın nəticələri namizədlərin yalnız şəxsi eyniləşdirmə kodu göstərilməklə dərc edilir.

Şifahi imtahanlar 5 mart 2024-cü il tarixdən etibarən mərhələli qaydada keçiriləcəkdir.

Xatırladaq ki, hakimliyə namizədlərin sənədlərinin qəbulu davam edir və 5 may 2024-cü il tarixdə keçiriləcək test imtahanında iştirak üçün artıq 151 namizəd sənədlərini təqdim edib. Hakimlərin Seçki Komitəsi yerlərin məhdudluğunu nəzərə alaraq, hakim olmaq arzusunda olan şəxsləri müsabiqədə daha fəal iştiraka dəvət edir.

Şifahi imtahana buraxılmış hakimliyə namizədlərin şəxsi eyniləşdirmə kodu üzrə

SİYAHISI